शिवा मार्गावर कंत्राटदाराच्या हलगर्जीपणामुळे सिमेंट मिश्रण वाहन उलटले नागरिकांचा तीव्र संताप
नागपूर-अमरावती राष्ट्रीय महामार्गावरील बाजारगाव ते शिवा मार्गावर सुरू असलेल्या सिमेंटीकरणाच्या कामादरम्यान एकवीस मार्च रोजी रात्री साडेअकरा वाजताच्या सुमारास मोठा अपघात घडला. संबंधित कंत्राटदार कंपनीचे सिमेंट मिश्रण वाहून नेणारे वाहन क्रमांक एमएच चाळीस डीसी तीन हजार वीस हे रस्त्याच्या कडेला उतरून पलटी झाले. या घटनेमुळे परिसरात मोठी खळबळ उडाली असून सुदैवाने चालक थोडक्यात बचावला आहे. या अपघातामुळे काही काळ वाहतूक पूर्णपणे ठप्प झाली होती.
या मार्गावर मागील अनेक महिन्यांपासून सुरू असलेले अर्धवट आणि संथ गतीचे बांधकाम नागरिकांसाठी मोठी डोकेदुखी ठरत आहे. रस्त्याची योग्य पातळी नसणे, रस्त्याच्या बाजूला असलेले खोल खड्डे आणि कुठेही सूचना फलक नसल्याने वाहनचालकांचा तोल जात असून येथे अपघातांची मालिका सुरूच आहे. स्थानिकांनी दिलेल्या माहितीनुसार, कंत्राटदाराच्या या कथित हलगर्जीपणामुळे यापूर्वीही अनेक अपघात झाले असून दोन तरुणांना आपला जीव गमवावा लागला आहे, तर अनेकजण गंभीर जखमी झाले आहेत. तरीही कंत्राटदार आणि प्रशासन या गंभीर समस्येकडे दुर्लक्ष करत असल्याचा आरोप नागरिकांनी केला आहे.
आता तर कंत्राटदार कंपनीच्या स्वतःच्याच वाहनाला अपघात झाल्याने कामातील नियोजनाचा अभाव आणि सुरक्षा नियमांचे उल्लंघन पुन्हा एकदा उघड झाले आहे. वारंवार होणाऱ्या अपघातांनंतरही जबाबदारांना जाग कधी येणार, असा संतप्त सवाल नागरिक उपस्थित करत आहेत. या मार्गावर तातडीने सूचना फलक लावण्यात यावेत, आवश्यक सुरक्षा उपाययोजना करण्यात याव्यात आणि अपूर्ण राहिलेले काम त्वरित पूर्ण करावे, अशी मागणी आता जोर धरू लागली आहे. तसेच संबंधित कंत्राटदार कंपनीवर कठोर कायदेशीर कारवाई करण्याची मागणीही परिसरातील त्रस्त नागरिकांनी केली आहे.
विशेष प्रतिनिधी चंदू मडावी
