महागाव-उटी मार्गावर LCB चा धडाका; अवैध रेती वाहतूक करणारा ट्रॅक्टर जप्त

महागाव-उटी मार्गावर LCB चा धडाका; अवैध रेती वाहतूक करणारा ट्रॅक्टर जप्त

 

 

 

४ लाख ६ हजारांचा मुद्देमाल हस्तगत; एका आरोपीविरुद्ध गुन्हा दाखल

 

 

प्रतिनिधी : एस. के. शब्बीर | यवतमाळ

 

 

जिल्ह्यात सुरू असलेल्या अवैध रेती उत्खनन व वाहतुकीविरोधातील विशेष मोहिमेत स्थानिक गुन्हे शाखा (एलसीबी) यवतमाळने महागाव पोलीस ठाणे हद्दीत मोठी कारवाई करत अवैध रेती वाहतूक करणारा ट्रॅक्टर-ट्रॉली जप्त केली. या कारवाईत सुमारे ४ लाख ६ हजार रुपयांचा मुद्देमाल हस्तगत करण्यात आला असून एका आरोपीविरुद्ध गुन्हा दाखल करण्यात आला आहे.

दि. १० जून २०२६ रोजी स्थानिक गुन्हे शाखेचे पथक उपविभाग उमरखेड हद्दीत गस्त घालत असताना महागाव-उटी मार्गावर ट्रॅक्टरद्वारे अवैध रेती वाहतूक होत असल्याची गोपनीय माहिती मिळाली. माहितीची खातरजमा करून पथकाने दोन पंचांच्या उपस्थितीत उटी फाट्यावर सापळा रचला.

काही वेळातच महागावकडून उटीकडे जाणारा महिंद्रा कंपनीचा लाल रंगाचा विना क्रमांक ट्रॅक्टर व निळ्या रंगाची ट्रॉली संशयास्पदरीत्या येताना दिसली. वाहन थांबवून तपासणी केली असता ट्रॉलीमध्ये रेती भरलेली आढळून आली.

चालकाकडे रेती वाहतुकीसाठी आवश्यक असलेली रॉयल्टी, वाहतूक पास किंवा अन्य वैध कागदपत्रांची मागणी करण्यात आली. मात्र चालक कोणतेही कागदपत्र सादर करू शकला नाही. त्यामुळे शासनाची परवानगी न घेता नदीपात्रातून रेती चोरी करून तिची वाहतूक केली जात असल्याचे निष्पन्न झाले.

यानंतर पथकाने एक ब्रास रेती (किंमत अंदाजे ६ हजार रुपये) तसेच ट्रॅक्टर-ट्रॉली (किंमत अंदाजे ४ लाख रुपये) असा एकूण ४ लाख ६ हजार रुपयांचा मुद्देमाल जप्त केला.

या प्रकरणी रामेश्वर मोहन पवार (वय ३०, रा. उटी, ता. महागाव) याच्याविरुद्ध भारतीय न्याय संहिता कलम ३०३(२) तसेच महाराष्ट्र जमीन महसूल अधिनियम १९६६ चे कलम ४७(७) व ४८(८) अन्वये महागाव पोलीस ठाण्यात गुन्हा दाखल करण्यात आला आहे.

ही कारवाई पोलीस अधीक्षक कुमार चिंता, अपर पोलीस अधीक्षक अशोक थोरात यांच्या मार्गदर्शनाखाली तसेच स्थानिक गुन्हे शाखेचे पोलीस निरीक्षक सतीश चवरे यांच्या नेतृत्वात करण्यात आली. स्थानिक गुन्हे शाखा, यवतमाळ (कॅम्प पुसद) यांच्या पथकाने ही कारवाई यशस्वीरीत्या पार पाडली.

ठळक मुद्दे महागाव-उटी मार्गावर एलसीबीची धडक कारवाई

अवैध रेती वाहतूक करणारा ट्रॅक्टर-ट्रॉली जप्त

४ लाख ६ हजार रुपयांचा मुद्देमाल हस्तगत

एका आरोपीविरुद्ध गुन्हा दाखल

जिल्ह्यातील रेती माफियांविरोधात पोलिसांची कारवाई तीव्र

“अवैध रेती उत्खनन व वाहतुकीविरोधातील मोहिम अधिक तीव्र करण्यात येणार असून नियमांचे उल्लंघन करणाऱ्यांवर कठोर कारवाई केली जाईल,” असा इशारा पोलिसांकडून देण्यात आला आहे.