लाखांदूर पोलिसांची मोठी कारवाई: क्रूर प्राण्यांची सुटका करत ५.९० लाखांचा मुद्देमाल जप्त!

लाखांदूर पोलिसांची मोठी कारवाई: क्रूर प्राण्यांची सुटका करत ५.९० लाखांचा मुद्देमाल जप्त!

लाखांदूर:

लाखांदूर पोलिसांनी एका गोपनीय माहितीच्या आधारे अत्यंत तत्परतेने कारवाई करत, गोवंश जनावरांची क्रूर आणि अवैध वाहतूक करणाऱ्या टोळीचा पर्दाफाश केला आहे. या धडक कारवाईत पोलिसांनी ९ गोवंश जनावरांची सुटका केली असून, बोलेरो पिकअप वाहनासह एकूण ५,९०,००० रुपयांचा मुद्देमाल जप्त केला आहे.

गुप्त माहितीवर पोलिसांचा तात्काळ छाप

मिळालेल्या माहितीनुसार, लाखांदूर पोलीस स्टेशनचे पोलीस अंमलदार केवटे यांना एका संशयास्पद वाहनातून जनावरांची अवैध वाहतूक होत असल्याची खात्रीशीर गोपनीय माहिती मिळाली. माहिती मिळताच पोलिसांनी जराही वेळ न गमावता नियोजित स्थळावर छापा (रेड) टाकला. पोलिसांच्या या अचानक आणि वेगवान कारवाईमुळे आरोपींना पळून जाण्याची कोणतीही संधी मिळाली नाही.

मुक्या प्राण्यांची क्रूरतेतून सुटका

घटनास्थळी पोलिसांनी ‘महिंद्रा बोलेरो पिकअप’ (क्र. MH 48 T 2111) हे वाहन ताब्यात घेतले. वाहनाची तपासणी केली असता, त्यामधील दृश्य पाहून पोलिसांचेही मन हेलावले. आरोपींनी ९ गोवंश जनावरांचे गळे आणि पाय आखूड दोरीने अत्यंत निर्दयतेने बांधून ठेवले होते. त्यांना चारा-पाण्याची कोणतीही व्यवस्था नव्हती, तसेच त्यांना श्वास घेणेही कठीण होईल अशा क्रूर पद्धतीने कोंबून कत्तलीसाठी नेले जात होते. पोलिसांनी अत्यंत संवेदनशीलतेने या सर्व मुक्या प्राण्यांची तात्काळ सुटका केली.

आरोपी जेरबंद आणि मुद्देमाल जप्त

या प्रकरणी पोलिसांनी दोन मुख्य आरोपींना अटक केली आहे:

१) पंकज संजय मेश्राम (वय २५, व्यवसाय: ड्रायव्हर, रा. चिचोली बु., ता. ब्रह्मपुरी, जि. चंद्रपूर)

२) मिनल राजवीर सिंग (वय २३, रा. गौतम नगर वॉर्ड, पवनी, जि. भंडारा)

पोलिसांनी ५,००,००० रुपयांची बोलेरो गाडी आणि प्रत्येकी १०,००० रुपये किमतीची ९ जनावरे (एकूण ९०,००० रु.) असा एकूण ५,९०,००० रुपयांचा मुद्देमाल जप्त करण्यात आला.

लाखांदूर पोलिसांनी आरोपींविरुद्ध गुन्हा रजि. क्र. ३८२/२०२६ अंतर्गत प्राण्यांना छळ प्रतिबंधक अधिनियम १९६० चे कलम ११(१) (घ), (ड), (थ), (ज), महाराष्ट्र प्राणी संरक्षण अधिनियम १९७६ चे कलम ५ अ (१), ९ आणि मोटार वाहन कायद्याच्या कलम १४६/१९६ अन्वये गुन्हा नोंदवून कायद्याचा कडक बडगा उगारला आहे.

ही अत्यंत यशस्वी आणि कौतुकास्पद कामगिरी माननीय पोलीस अधीक्षक श्री. नूरुल हसन साहेब, माननीय अपर पोलीस अधीक्षक निलेश मोरे साहेब आणि सपोनि मुंडे साहेब यांच्या खंबीर मार्गदर्शनाखाली पार पडली. प्रत्यक्ष कारवाईत पोलीस उपनिरीक्षक जुनोनकरे आणि पोलीस अंमलदार केवटे यांनी उल्लेखनीय शौर्य व चपळाई दाखवली. या यशस्वी कामगिरीबद्दल लाखांदूर पोलिसांचे सर्व स्तरांतून कौतुक होत असून, पुढील तपास पो.उपनि. जुनोनकरे करत आहेत.

भंडारा जिल्हा उपसंपादक अनिल ढोलवार